Vosorassvātku svātdīne
Bez Tevis, Kungs Jezu, mes nikō navaram dareit, bet Tu esi apsūlējis mums syuteit spāka un patīseibas Goru.
Tu mums esi sacējis, ka dabasu Tāvs dūs Goru tim, kas nu Jō tū lyudz; Goru, kurs nōk paleigā myusu naspākam, lai īmōceitu mums lyugtīs, kai pīsanōk, un kurs pats aizlyudz par mums. Jezu, muns Pesteitōj, dōvoj maņ tagad lyugšonas Goru, dūd maņ Tova Mīlesteibas Gora sveidējumu.
Vysuaugstōkō Dīva Dōvona, nōc manī!
Gudreibas un saprōta Gors, nōc manī!
Zineibu un dīvbejeibas Gors, nōc manī!
Pīlyugsmes un slavēšonas Gors, nōc manī!
Pazemeibas Gors, nōc manī!
Žēlesteibas un lyugšonas Gors, nōc manī!
Svātais Gors, dorbojīs manī un lic maņ dorbōtīs Dīva gūdam.
Lyudzīs manī un lic maņ caur Tevi lyugt dzeivū Dīvu.
Mīļoj mani un lic maņ mīļōt ar Jezus mīlesteibu.
Runoj manī un lic munōs lyupōs Kristus vōrdus.
Nōc un lic, lai es pīlyudzu Dīvu gorā un patīseibā.
Kungs Jezu, palelynoj tū ticeibas māru, kū Tu maņ esi jau pīškeiris, un kurs maņ dūd īspēju ticēt Tev un vysom atklōtajom patīseibom, kū mōca Tova Bazneica. (Nu grōmoteņas „Lūgties kā Ķēniņa bērnam”)
PŌRDŪMOM
Dīva Gors lyudzās myusūs.
„Taipat ari Gors paleidz myusu vōjumam, jo mes eisti nazynam, kū lai lyudzam, un Gors pats aizbyldynoj par mums ar nūpyutom, kas nav izsokamas vōrdūs.(Rom 8,26)
Mes nikod tik stypri naizjyutam sovu naspāku, kai lyugšonas laikā. Cik bīži myusu dūmas izkleist uz vysom pusem, un mes palīkam vōji ceņtīņūs paceļt tōs uz Kungu! Kurs nu mums nav cītis nu šōs naspējas lyugtīs, kurs gon nav izjutis šū atsolumu, šū sausumu, kas apjem myusus, un pret kurim mes asam naspējeigi ceineitīs? Reizem mes nazynam, par kū lyugtīs, mes prosam na tū, kas vysvairōk vajadzeigs, - mes naprūtam apjēgt lyugšonas goru, myusim nav tōs ticeibas, kas īmōceitu myus nūlikt myusu nostu Kristum pi kōjom un atstōt tū tī ar piļneigu paļōveibu.
Mes poši asam bezspēceigi un navareigi, bet Dīva Gors var myus styprynōt – „Jys paleidz myusu vōjumam”. Vīneibā ar Dīvu Tāvu Jam ir zynoms tys, kū Kungs labvēlejās mums dōvōt, un, kod mes poši nazynam, par kū lyugtīs, Jys aizbylst par mums ar vōrdūs naizsokamom nūpyutom.
Atdzeivynōtōjs Dīva Gors var ļaut mums sajust pavysam naapzynōti myus aptverūšū augstōkū vēlēšonūs un tīksmju straumi, kas atbreivoj myus nu šōszemes ryupem. Pasaļausim šai straumei ar vysu myusu byuteibu, atstōjūt molā myusu seikōs ikdīnas napatikšonas, kuras bīži vīn myus pīsaista šai zemei, - pasaceļsim uz augšu, kaut vai lyugšonā bez vōrdim, zynūt tū, ka „vōrdūs naizsokamōs nūpyutas” aizbylst par mums Vysuaugstōkō Trūņa prīškā!
Lai naapvoldamō vēlēšonōs reizem pat sōp, lai myusu sirds slōpst un raud; Kungs taidūs breižūs dora myusu dvēselē lelas lītas, izlejūt pōr mums svēteibu leitu un dzesejūt myusu slōpes!
Lyuk, kaida ir eista lyugšona: dvēseles censšonōs izlīt Dīva prīkšā vysu dziļū, naizsokamū, mums pošim nasaprūtamū, vōrdūs naizteicamū un ar naapjaušamom skumem pōrpylnū, olkstūšū sirdi. Un Dīva Gors, kas mōjoj myusūs, pajem nu mums šū lyugšonu, un Pats lyudzās myusūs!
***
„Tur, kur uzaturēja mōcekli, aiz bailem nu jūdim beja aizslāgtas durovas, atnōce Jezus, nūsastōja jūs vydā un jim sacēja: „Mīrs jums!”(J 20,19)
Nasabeisim, kod Kristus pasarōda myusu nūcītynōtajōs sirdīs. Pīeja tai ir it kai aizslāgta; mes poši ītīpeigi aizslādzam sovu siržu durovas vysam lobajam, naprōteigā lepneibā atraidam nu sevis „vīneigū vajadzeigū” un cenšamēs nūslōpēt myusu sirdsapziņas bolsu, kurs mums nadūd mīru. Bet pat šajā ītīpeigajā atsasvešynōšonā, šajā it kai naījemamajā cītūksnī, kurā mes īsaslādzam, Kungs var pasarōdeit, kod mes Jū pavysam nagaideisim, myusu patmīleibas, naeistū jyutu, pasauleigū dūmu vydā, un var mums pasaceit: „Mīrs jums!” Kungs gryb myusu pesteišonu un, ignorejūt vysas myusu naskaitamōs nalykumeibas, Jys klauvej pi myusu sirds durovom. Kaut ari Jys atrūn šōs durovas aizslāgtas, Jys tūmār īnōk tajā un apgaismoj ar Sovu gaismu myusu dvēseles mikrēsli.
Kungs Jezu, īnōc ari munā sirdī! Tu, kas esi uzcēlis nūmyrušū, Tu, kas Pats esi Augšancālušais Kristus, uzmūdynoj ari manī apklusušū lobū sāklu un pat caur aizslāgtom durovom īnōc munā sirdī, apgaismoj munu oklumu ar Tovas klōtbyutnes gaismu un ļauņ man sadzērdeit Tovu Svātū Vordu: „Mīrs jums!”. ( Nu grōmotas „Kotra dīna – Dīva dōvona” krīvu vol.)
Nōc, Svātais Gors!
Pēc Jezus debeskōpšonas kristīšu saime palyka kūpā, vīnprōteigi lyugšonōs kūpā ar Mariju, Jezus Mōti. Šei kristīšu saime veļ nabeja kristeigō Bazneicā pylnā vōrda nūzeimē, jo tei nabeja sajāmuse Svātū Goru. Kristīšu saime lyudze Dīvu, un Svātais Gors nōce pōr jim Vosorassvātku dīnā, un tei sajēme spāku līcynōt par Kristu. Vosorassvātku dīna dzyma Bazneica.
Svātais Gors deve apostolim sevišku spēju runōt vysōs volūdōs, tai pasludynōdams par ciļvēces apsavīnōšonu. Cylvāki ar sovu ciļvēciskū darbeibu beja ciļvēci saškāluši. Atcerēsimēs kaut vai Bābeles tūrņa cālōjus. Svātō Gora atnōkšona Vosorassvātkūs ir ciļvēces apsavīnōšonas izejas punkts.
Latvijā Vosorassvātkūs ir parodums izrūtōt ustobas ar bārzu zorim. Veistūšī bārzi smaržoj kai balzams un īprīcynoj cylvāku sirdis. Šei smarža ir naradzama, taipat kai Svātō Gora klōtbyutne myusūs ari ir naradzama, bet tei izmaina myuus dzeivi. Bārzi zaudēja dzeiveibu, lai jūs pateikamō smarža dūtu mums svātku nūskaņu; ari Kristus nūmyra, lai mums atsyuteitu Svātū Goru. Ari mums pošim ir jōmērst grākam, lai Svātō Gora lobō smarža byutu jyutama myusu dzeivē, šei, ar juteklim nasajyutamō smarža, kas padora dzeivi dīviškeigu, jo Svātō Gora augļi ir: mīlesteiba, prīks, mīrs, pacīteiba, laipneiba, augstsirdeiba, lānprōteiba, uzticeiba, pīklōjeiba, attureiba, škeisteiba – tai soka sv. Pōvuls vēstulē galatīšim. Bet 1. vēstulē korintīšim Pōvuls izskaidroj, ka Svātais Gors ir Bazneicas dvēsele un ka Svātō Gora dōvonas izapauž kolpōšonā un nasavteigā darbeibā leidzcylvāku lobā.
Ikvīnam nu mums ir dūta īspēja dorbōtīs Svātō Gora ītekmē. Svātais Gors myus syuta pasaulē izpiļdeit myusim dūtu uzdevumu. Svātais Gors vēlejās izveidōt nu myusim svātūs. Lai tys byutu īspējams, myusim ir jōļaun sevi vadeit nu Svātō Gora, taipat kai Jezus ļōve sevi vadeit Svātajam Goram. Mes – kristīši – asam sajāmuši Svātū Goru jau kristeibā un veļ vairōk – īstyprynōšonas sakramentā. Ar Īstyprynōšonas sakramentu Svātais Gors myus dora aktivus. Naaizmērssim, ka na tikai goreidznīki ir Svātō Gora leidzdarbīki, bet ari vysim kristīšim ir uztycāta īpaša lūma Bazneicas darbeibā. Svātais Gors vysim dūd prōta gaismu, teirej sirdis un dūd spāku, lai ikvīns spātu līcynōt par Kristu. Tōpēc vysim kristīšim ir jōlyudz Svātais Gors, lai Jys mums paleidz byut par eistim kristīšim, jo tikai Svātais Gors spēj paleidzēt Dīva vōrdu pareizi saprast un ikvīnā gadejumā izaturēt kai eistam kristīšam. Tikai Svātais Gors spēj dūt spāku gryuteibōs izavēlēt tū, kas ir lobs, un dōvōt cylvākam dīviškū izpratni, kas atklōj, ka goreigōs un myužeigōs vērteibas ir augstōkas par pōrejūšajom lītom. Tikai Svātais Gors spēj dūt cylvākam eistu dīvbejeibu un paceļt jō prōtu uz Dabasu Tāvu. Svātais Gors dūd mums ari Dīva spāku izavaireit nu grāka.
Jo mes vēlejamēs sasnēgt kaut kū cālu un augstu, un ar vysim spākim cenšamēs tū eistynōt, tod Svātais Gors mums paleidzēs; un byus sasnāgts na tikai īcarātais mērķis, bet mes poši ari byusim svātdareiti, kļyusim svāti. (V.E.A. Brumanis nu grōmotas „Dzīvais vārds”)
Litanija uz Dīvu Svātū Goru (privatai laseišonai)
Kyrie, eleison! Chryste, eleison! Kyrie, eleison!
Kristu, klausi myus! Kristu, uzklausi myus!
Dīvs Tāvs nu dabasim, apsažāloj par mums!
Dīvs Dāls, pasauļa Pesteitōjs, apsažāloj par mums!
Dīvs Svātais Gors, apsažāloj par mums!
Svātō Trejadeiba, vīns Dīvs, apsažāloj par mums!
Svātais Gors, Trešō Vysusvātōkōs Trejadeibas Persona, apsažāloj par mums!
Svātais Gors, kurs nu Tāva un Dāla izīt, apsažāloj par mums!
Svātais Gors, kurs pasaules radeišonas īsōkumā nūsalaidi pōr yudinim, apsažāloj par mums!
Svātais Gors, kurs bolūža veidā pasarōdēji vērs Kristus pi Jordanas upes, apsažāloj par mums!
Svātais Gors, kurs nūsalaidi pōr apostolim guņs mēļu veidā, apsažāloj par mums!
Svātais Gors, kurs Kunga mōcekļus pīpiļdēji ar dedzeibas goru, apsažāloj par mums!
Svātais Gors, kurs myus atdzymdynōji svātōs kristeibas yudinī, apsažāloj par mums!
Svātais Gors, kurs myus spācynōji Īstyprynōšonas sakramentā, apsažāloj par mums!
Svātais Gors, caur kuru Dīvs myus padora par sovim bārnim, apsažāloj par mums!
Svātais Gors, kurs īlej myusu sirdīs Dīva mīlesteibu, apsažāloj par mums!
Svātais Gors, kurs myus mōci patīsai dīvbejeibai, apsažāloj par mums!
Svātais Gors, prīka olūts, apsažāloj par mums!
Svātais Gors, myusu sirdsapziņas sorgōtōjs, apsažāloj par mums!
Svātais Gors, klōtasūšs myusūs caur Dīva žēlesteibu, apsažāloj par mums!
Svātais Gors, gudreibas un saprōta devējs, apsažāloj par mums!
Svātais Gors, padūma un veiriškeibas dōvōtōjs, apsažāloj par mums!
Svātais Gors, prōta un dīvbejeibas devējs, apsažāloj par mums!
Svātais Gors, Dīva baimes īdvesējs, apsažāloj par mums!
Svātais Gors, ticeibas, cereibas un mīlesteibas dōvōtōjs, apsažāloj par mums!
Svātais Gors, grāku nūžālas un gondareišonas īdvesējs, apsažāloj par mums!
Esi mums žēleigs, atlaid mums, Svātais Gors.
Esi mums žēleigs, uzklausi myus, Svātais Gors.
Esi mums žēleigs, izpestej myus, Svātais Gors.
Nu šaubom par Dīva žēlesteibas pestejūšū īdarbeibu, pasorgoj myus, Svātais Gors.
Nu pretōšonōs kristeigom patīseibom, pasorgoj myus, Svātais Gors.
Nu leidzjyuteibas tryukuma pret myusu tyvinīkim, pasorgoj myus, Svātais Gors.
Nu aizacītynōšonas grākūs, pasorgoj myus, Svātais Gors.
Nu nūlaideibas gondareišonas dorbūs, pasorgoj myus, Svātais Gors.
Nu vysom ļaunom un naškeistom dūmom un dorbim, pasorgoj myus, Svātais Gors.
Nu pēkšņas un nagaideitas nōves, pasorgoj myus, Svātais Gors.
Nu myužeigōs pazusšonas, pasorgoj myus, Svātais Gors.
Mes, grēcinīki, Tevi lyudzam, uzklausi myus, Svātais Gors.
Ka Tu Sovu svātū Bazneicu vadeitu un sorgōtu, Tevi lyudzam, uzklausi myus, Svātais Gors.
Ka Tu myus katōliskajā ticeibā styprynōtu, Tevi lyudzam, uzklausi myus, Svātais Gors.
Ka Tu mums iztureibu un veiriškeibu dōvōtu, Tevi lyudzam, uzklausi myus, Svātais Gors.
Ka Tu myusu prōtus uz ilgom pēc dabasu vaļsteibas nūvērzeitu, Tevi lyudzam, uzklausi myus, Svātais Gors.
Ka Tu myusūs sev pīnōceigu mōjvītu sagatavōtu, Tevi lyudzam, uzklausi myus, Svātais Gors.
Ka Tu myus cīsšonōs mīrynōtu, Tevi lyudzam, uzklausi myus, Svātais Gors.
Ka Tu myus Sovā žēlesteibā styprynōtu, Tevi lyudzam, uzklausi myus, Svātais Gors.
Ka Tu mums vysim pesteišonu dōvōtu, Tevi lyudzam, uzklausi myus, Svātais Gors.
Dīva Jārs, kas nūceļ pasauļa grākus, atlaid mums, Kungs un Dīvs!
Dīva Jārs, kas nūceļ pasauļa grākus, uzklausi myus, Kungs un Dīvs!
Dīva Jārs, kas nūceļ pasauļa grākus, apsažāloj par mums!
P. Dīvs, rodi manī teiru sirdi.
V. Un patīseibas Goru atjaunoj manī.
Lyugsimēs. Dīvs, Svātais Gors, kas esi sapulcynōjis vysas tautas ticeibas vīnōteibā, nōc un pīpyldi Tovu kolpu sirdis ar Sovu žēlesteibu, īdedz myusu sirdīs Tovas mīlesteibas guni un pasorgoj nu vysa ļauna. Caur myusu Kungu Jezu Kristu, kurs ar Tevi un Tāvu dīviškeigā vīneibā dzeivoj un volda myužeigi myužam. Amen.
Ziņas nu Vatikana.
Pēc trejom nedeļom sōksīs Prīstereibas gods, kuru pāvests izsludynōja 16. martā, teikūtīs ar Klera kongregacijas reikōtōs plenarsēdes daleibnīkim. Svineibu nūrises programa ītvarta kongregacijas prefekta kard. Klaudio Hjummesa un sekretara arhiv.Mauro Piačencas paraksteitajā vēstulē, kas nūsyuteita vysim veiskupim. „Mes varam lepōtīs ar daudzim lobim un svātim prīsterim,”roksta kardinals Njumess. „Tys byus prīsteru lyugšonu gods, kūpā ar prīsterim un par prīsterim.”
Kardinals skaidroj, ka Bazneica vēlejās jim parōdeit mīlesteibu, cīnu un pateiceibu. Bez prīsterim nabyutu Bazneicas. Klera kongregacijas prefekts atzyna, ka šudiņ dažu prīsteru reiceiba bīži vīn roda nūpītnas problemas. Jys uzsvēre, ka šaidūs gadejumūs ir napīcīšams ryupeigi izpēteit situaciju un strōpēt vaineigūs. Bet lelōkais vairums prīsteru ir lyugšonas cylvāki, kuri pošaizlīdzeigi kolpoj Kristum un brōlim. Ar sovu dzeivi jī aplīcynoj mīlesteibu uz Dīvu, Bazneicu un cylvākim. Kardinals Hjumess uzsvēre, ka lelōka uzmaneiba ir jōveļtej ari apstōklim, kaidūs dzeivoj prīsteri.
Prīstereibas goda tema „Kristus uzticeiba, prīstera uzticeiba”. Prīstereibas gods sōksīs 19. junijā, Vysusvātōkōs Jezus Sirds svātkūs. Pāvests prīstereibas godu atklōs ar vesperem sv. Pītera bazilikā. Nu Francijas tiks atvastas sv. Jōņa Vianneja relikvijas. Šūgod 4. junijā Bazneica atzeimēs jō nōves 150. godadīnu. Jau nu 1928. goda sv.Jōņs Viannejs teik gūdynōts kai prāvestu aizbiļdnis, bet šūgod pāvests Benedikts XVI pasludynōs jū par vysu prīsteru debeseigū aizbiļdni.
Klera kongregacijas vadeitōji aicynoj veiskupus 19. junijā goreigi vīnōtīs ar pāvestu, atklōjūt Prīstereibas godu sovu diecežu katedralēs un lelōkajūs sanktuarijūs. Jubilejas goda ītvorūs tiks izdūts dokuments „Īteikumi biktstāvim un goreigajim vadeitōjim”, kai ari Benedikta XVI uzrunu apkūpōjums par prīsteru dzeivi un misiju myusdīnu pasaulē. Plašōku informaciju par Prīstereibas goda pasōkumu programu var īgyut Klera kongregacijas interneta mōjas lopā www.clerus.org. Tajā publiceiti ari materiali, kas paradzāti prīsteru rekolekcijom, lyugšonu dīnom un cytim pastoralajim pasōkumim.
Jubilejas gods nūsaslēgs 2010. goda 11. junijā, Vysusvātōkōs Jezus Sirds svātkūs. Tei byus ari Pasaules Prīsteru dīna. (Vatikana radio)
ZIŅŌJUMI
31.maijs – VOSORASSVĀTKU SVĀTDĪNE
Aglyunā sv. Mises plkst. 7.00; 9.00(bārnu I sv.Komunija); 12.00 (procesija); plkst.. 17.00 – V.J.Sirds litanija; vokora Mise – plkst. 19.00
Kopusvātki: 14.00 Gūteņu kopūs, Aglyunas draudzē
16.00 Rutuļu kopūs, Rušyunas draudzē
14.00 Makušu kopūs, Bērzgales draudzē
16.00 Gutas kopūs, Bērzgales draudzē
14.00 Leitānu kopūs, Aglyunas draudzē
16.00 Madelānu kopūs, Bērzgales draudzē
1.junijs – pyrmūdīne, ŪTRĪ VOSORASSVĀTKI, V.J.Marijas – Bazneicas Mōtes svātki, sv. Mises Aglyunā plkst. 7.00;10.00;12.00; plkst. 17.00 – V.Jezus Sirds litanija; Vokora Mise – plkst. 19.00
2.junijs – ūtardīne, TREŠĪ VOSORASSVĀTKI
Aglyunā sv. Mises plkst. 7.00;10.00; 12.00 sv. Misi vadeis pāvesta nuncijs Baltijas valstīs V.E. Luidži Bonacci, Īstyprynōšona; vokora Mise plkst.19.00
7. junijs – sv. Mises Aglyunā plkst. 10.0; 12.00; 19.00. Bērzgalē – plkst.9.30; Rušyunā – plkst. 11.00
Prīceigus Vosorassvātkus! Lai Dīvs Svātais Gors bogōteigi izlej pōr jums Sovas dōvonas!